Compte del Puget

1536-1537

1. (Fol. 1) S'ensegue so que los sendegues Tardelhi et Boti an debossat del temps de lur sendegat, de l'an 1536 et 37, en utilitat et profiech de la villa.
2. Et primo, avem donat al fustier del Villar, per fustar los gabions, ff. iiij.
3. Item, avem comprat del fabre Dauverna de fustas per far losd. bastions, ff. ij.
4. Item, avem comprat de senepos per metre en losd. bastions, ff. ij. Item, en d'agus a Glaude Bastart, g. iiij.
5. Item, devem a ung home que portessa una letra a Loyson del Pons, per l'enformar de certz affayres que entrevenion, g. ij.
6. Item, avem donat als gippiers, per far lo bastion de la Clua, ff. ij.
7. Item, avem donat a Elzias Magalon, loqual fon eligit commissari per anar a Nissa per entendre que fon ordenat als Tres Estas, ff. v.
8. Item, a Johan Tayo, per portar de perdisses a Nissa, g. ij.
9. Item, avem mandat Anthoni Prioris a Peyrafuec, per querre cert argent que devion a la villa, g. vj.
10. Item, avem donat a Loyson Salvayre, comissari, sobre far far liechs et visitar lo vim, commo es estat ordenat que li donessan, g. j.
11. Item, avam donat a l'Auvernias et appolet per fustar lo gabion de l'adrech, ff.iiij.
12. Item, avem donat al teulier per de teules, per cubrir los gabions, ∇ j.
13. Item plus, per de senepes et agus, vz f. j. g. viij.
14. Item, avem comprat ung chabrion del fustier de Thieri per metre en lod. gabion, g. iij.
15. Item, avem donat a Requiston que gippet en lod. gabion, g. vj.
16. (Fol. 2) Item, avem despendut, tant en pan que vin, per donar als Spanhols que passavon per ayssi quant menaron los Ramos de la Cros per preyssoniers, ff. v.
17. Item, avem donat a Ginoeri per sa mulla, quant portet Saqui a Nissa, lo qual ero enbayssador, f. j. g. vj.
18. Item, manden lo cordier al Toet per veser se los Espagnols venion ayssament quant anavon desfar la Pena g. ij.
19. Item avem donat a Loys Prioris per la gardia del portal, en execution de una ordenansa facha en conselh, vz f. j. g. iiij.
    ...........................................................
20. (Fol. 3) S'ensegue so que avem exhygit de la villa. Et primo avem agut de Peyre Admirat a prest ∇ iij.
    Item, de la villa de Peyrefuec ∇ vj.
    Item avem vendut del gip que ero a Sanct Augostin per so que ero tout pres douze saumadas, f. j. g. vj.