Consert dei Passeron per Passeron
(1768)
Aiglià dintr'acheu giardin,
Li ha un nouveu galofre et un deissemin
Un beu balichi esplandi
Una magiurana e una flou de li
Lo gauce, e lo tulipan,
La rosa e lo sangioan
Son achì pèr flourì,
E la violetta es gia da cueglì.
Li si sente au fà dòou giour
Cantà lo canari versets d'amour;
Li s'aude lo roussignòou,
Che n'appren d'arieta au barbairòou;
La bouscarla e lo gai
Cour vèn lo mes de mai
Che s'abiglia de vert,
Aloura li van faire lo consert.
Li s'aude fin lo chinson
Che fa intrà lo dièsis au rigaudon,
Au minuet lo bemol
Coura dis la grùa ut, re, mi, fa, sol.
Li va lo beccafic
Dòou buon colomb amic
Che rende lo salut
A la cagliera en trilan la, si, ut.
La calandra e lo morguos
La griva, la neccioula e lo pessuos
Li van fa cicirici
Au clar de la luna embe tan d'espri,
Li va lo darnagas
Che non sau faire un pas
Se non ha lo verdon
Che fa au papagau dire la lisson.
Tirsi, vòou che lo faigià
Regle lo consert, e lo pitablà
S'accorde embau ganaveu,
Embe la petoua, embe l'estourneu,
Cagliera e esparvié
Che siblon volentié;
E puorte lo cuorrous
Cada giou a Clori un bouchet de flous.
Plas au canard, au pavon,
E a la tourdorella lo faus bordon
Che suol dintre lo giardin
Faire la lardiera sera e matin.
Li s'aude ai nòu d'abril
La sesera gentil
Canta embe lo garon,
Embe la cruella, embe lo faucon.
Rondinella che non vas
Assistre au concert? e tu aigla che fas,
Caponero grassious,
Che siès tant alert e tant amourous?
Se ti vuos faire onour,
Sibla embe lo nastour;
En tan beccassa estai,
E tu cardolina all'entour dòou mai.
Li va cantà lo rigau
Lo tourdo, cour non fa frei, ni cau,
La perdis e lo vautour
E lo merlo che sau fa lo tenour ;
Li va embau courpatas,
Lo duc che fas lo bas,
L'aigla ch'ha l'ueigl ardi
E la ballarina ch'ha un beu clari.
Tu che cantes cour fa frèi
Dintre lou giardin embau ventre vùei
Torneten en lo desert
Non venì n'embrouglià sto dous consert
Embe la tieu canson,
Sauvage Passeron,
Aissì non cantà plus,
E vai, vaiti escondre dintr'un pertus.
La canson val un patau,
Val un giaune d'òou, ansin val plus pau
Val un rèn, e jeu mencion
N'hai perdut lo tap e lo cougourdon.
Enfans grans e piccions,
Aumanco d'ausselons
Coujèmen aissì nòou,
Catre su la graia, e sinc au pairòou.