Lo belh dous temps m'platz
E la gaya sazos,
E·l chans dels auzellos;
E s'ieu fos tan amatz
Com sui enamoratz,
Feria gran cortezia,
Ma bella douss'amia.
E pus nulh be no m'fai,
Las! e donx que farai?
Tant atendrai aman
Tro morrai merceyan,
Pus ilh vol qu'aissi sia.
Aissi•m suy autreyatz
Ab leial cor a vos,
Bella domna e pros,
Quel nulh autre solatz
Ni autr'amor no·m platz
Ni autra drudaria,
Ni mos cors no·s cambia;
Per vos, domna, morrai:
Quar me trobatz verai,
Vos en prendetz lo dan
E non es benestan
Qu'hom eys lus sieus aucia.
Dompna, vostra beutatz,
E las bellas faissos,
E•l belh huelh amoros,
E•l gen cors tant tallatz
Don sui empreyzonatz,
De vostr'amor que•m lia,
Si be•l truep ab fadia,
Ja de vos no•m partrai;
Que maior honor ai
Sol en vostre deman
Que s'autra•m des bayzan
Tot quant de vos volria..