Messegnors los consols nos recommandam de bon cor a vos. A nos es estat expausat per part del noble Peyron Embrun merchant et de Raphel Mantea patron citadins daquesta citat de Nissa consins per vigor et en execution duna crida facha en vostra citat dArle laqual conten que tota persona susdita de la maiestat real de Fransa et subdita ducat de la segnoria de Savoya et de Nissa puesca cargar tous blas en ladicta citat dArle per los condurre a ladicta citat de Nissa vo a Villafranca et ayssins fasent non sera dona negun empachament coma plus largament si conten en ladicta crida lo dict noble Peyron a comprat tres cens et trenta sestiers de seguel a la mesura dArle losquals a cargat sobre la saytiera deldit Raphel Mantea patron daquella per los condurre aysit a Nissa et per maior cautela vostra losdicts merchans et patron los aves fach obligar et cors et bens en bona forma et sus la pena de XXV marcs dargent a totas cors de condurre lasdictas seguels a Nissa vo a Villafranca et de non las transportar en autra part per si ni per autres et venent la dicta saytiera per forsa de temps es intrada en lo port de Tollon en loqual luoc es estada arrestada et detenguda et la detenon al present et li donan grant empachament laqual causa es grant enteresse et grant dammage delsdichs merchant et patron et car lodit noble Peyron en nom sieu et del dict patron per maior segurtat et cautela se obligit en bona forma en nostra mans de condurre lodict gran ayssi a Nissa et de non lo transportar en autra part. Per tant vos pregam carement et affectuosament vos plassa d'escriure a monssegnor lo grant senescal de Provensa et als autres que vos semblara que vuelhan mandar relaxar losdicts seguels et ladicta saytiera et totas causas mandant que non lur sia donat degun empachament. Coma speram que faran las vostras spectabilitas per las quals sem prestes et prompts de lur complayre en semblant et maior causa lasquals Dieu vuelha conservar coma desiran. Scricha a Nissa lo segon jorn de may 1496.
Los tous vostres coma frayres Los sentegues de Nissa
Rossetus